Praefationes Missali Romani

Praefationes Missali Romani collectae

Collected Prefaces of the Roman Missal

For the ease of page navigation, the prefaces of the Roman Missal are presented on this page which corresponds to the page for the course on prefaces.

Praefationes
ex Missali Romani editio MMII excerptae

Prefaces
Selected from the 2002 edition of the Missale Romanum

PRAEFATIO I DE ADVENTU

De duobus adventibus Christi

Vere dignum et iustum est,
aequum et salutare,
nos tibi semper et ubique gratias agere:
Domine, sancte Pater,
omnipotens aeterne Deus
per Christum Dominum nostrum.

Qui, primo adventu in humilitate carnis assumptae,
dispositionis antiquae munus implevit,
nobisque salutis perpetuae tramitem reseravit:
ut, cum secundo venerit in suae gloria maiestatis,
manifesto demum munere capiamus,
quod vigilantes nunc audemus exspectare promissum.

Et ideo cum Angelis et Archangelis,
cum Thronis et Dominationibus,
cumque omni militia caelestis exercitus,
hymnum gloriae tuae canimus,
sine fine dicentes: Sanctus …

PRAEFATIO II DE ADVENTU

De duplici exspectatione Christi

Vere dignum et iustum est,
aequum et salutare,
nos tibi semper et ubique gratias agere:
Domine, sancte Pater,
omnipotens aeterne Deus:
per Christum Dominum nostrum.

Quem praedixerunt cunctorum praeconia prophetarum,
Virgo Mater ineffabili dilectione sustinuit,
Ioannes cecinit affuturum et adesse monstravit.
Qui suae nativitatis mysterium
tribuit nos praevenire gaudentes,
ut et in oratione pervigiles
et in suis inveniat laudibus exsultantes.

Et ideo cum Angelis et Archangelis,
cum Thronis et Dominationibus,
cumque omni militia caelestis exercitus,
hymnum gloriae tuae canimus,
sine fine dicentes: Sanctus …

PRAEFATIO I DE NATIVITATE DOMINI

De Christo luce

Vere dignum et iustum est,
aequum et salutare,
nos tibi semper et ubique gratias agere:
Domine, sancte Pater,
omnipotens aeterne Deus:

Quia per incarnati Verbi mysterium
nova mentis nostrae oculis lux tuae claritatis infulsit:
ut, dum visibiliter Deum cognoscimus,
per hunc in invisibilium amorem rapiamur.

Et ideo cum Angelis et Archangelis,
cum Thronis et Dominationibus,
cumque omni militia caelestis exercitus,
hymnum gloriae tuae canimus,
sine fine dicentes: Sanctus …

PRAEFATIO II DE NAVITATE DOMINI

De restauratione universa in Incarnatione

Vere dignum et iustum est,
aequum et salutare,
nos tibi semper et ubique gratias agere:
Domine, sancte Pater,
omnipotens aeterne Deus:
per Christum Dominum nostrum.

Qui, in huius venerandi festivitate mysterii,
invisibilis in suis, visibilis in nostris apparuit,
et ante tempora genitus esse coepit in tempore;
ut, in se erigens cuncta deiecta,
in integrum restitueret universa,
et hominem perditum ad caelestia regna revocaret.

Unde et nos, cum omnibus Angelis te laudamus,
iucunda celebratione clamantes: Sanctus …

PRAEFATIO III DE NATIVITATE DOMINI

De commercio in Incarnatione Verbi

Vere dignum et iustum est,
aequum et salutare,
nos tibi semper et ubique gratias agere:
Domine, sancte Pater,
omnipotens aeterne Deus:
per Christum Dominum nostrum.

Per quem hodie commercium nostrae reparationis effulsit,
quia, dum nostra fragilitas a tuo Verbo suscipitur,
humana mortalitas non solum
in perpetuum transit honorem,
sed nos quoque, mirando consortio, reddit aeternos.

Et ideo, choris angelicis sociati,
te laudamus in gaudio confitentes: Sanctus …

PRAEFATIO DE EPIPHANIA DOMINI

De Christo lumine gentium

Vere dignum et iustum est,
aequum et salutare,
nos tibi semper et ubique gratias agere:
Domine, sancte Pater,
omnipotens aeterne Deus:

Quia ipsum in Christo salutis nostrae mysterium
hodie ad lumen gentium revelasti,
et, cum in substantia nostrae mortalitatis apparuit,
nova nos immortalitatis eius gloria reparasti.

Et ideo cum Angelis et Archangelis,
cum Thronis et Dominationibus,
cumque omni militia caelestis exercitus,
hymnum gloriae tuae canimus,
sine fine dicentes: Sanctus …

IN BAPTISMATE DOMINI

Iesu baptizato et orante, apertum est caelum

Vere dignum et iustum est,
aequum et salutare
nos tibi semper et ubique gratias agere:
Domine, sancte Pater,
omnipotens aeterne Deus:

Qui miris signasti mysteriis novum in Iordane lavacrum,
ut, per vocem de caelo delapsam,
habitare Verbum tuum inter homines crederetur;
et, per Spiritum in columbae specie descendentem,
Christus Servus tuus oleo perungi laetitiae
ac mitti ad evangelizandum pauperibus nosceretur.

Et ideo cum caelorum virtutibus
in terris te iugiter celebramus,
maiestati tuae sine fine clamantes:

PRAEFATIO I DE QUADRAGESIMA

De spiritali significatione Quadragesimae

Vere dignum et iustum est,
aequum et salutare,
nos tibi semper et ubique gratias agere:Domine, sancte Pater,
omnipotens aeterne Deus:
per Christum Dominum nostrum.

Quia fidelibus tuis dignanter concedis
quotannis paschalia sacramenta
in gaudio purificatis mentibus exspectare:
ut, pietatis officia et opera caritatis propensius exsequentes,
frequentatione mysteriorum, quibus renati sunt,
ad gratiae filiorum plenitudinem perducantur.

Et ideo cum Angelis et Archangelis,
cum Thronis et Dominationibus,
cumque omni militia caelestis exercitus,
hymnum gloriae tuae canimus,
sine fine dicentes: Sanctus …

PRAEFATIO II DE QUADRAGESIMA

De spiritali paenitentia

Vere dignum et iustum est,
aequum et salutare,
nos tibi semper et ubique gratias agere:
Domine, sancte Pater,
omnipotens aeterne Deus:

Qui filiis tuis ad reparandam mentium puritatem,
tempus praecipuum salubriter statuisti,
quo, mente ab inordinatis affectibus expedita,
sic incumberent transituris
ut rebus potius perpetuis inhaererent.

Et ideo, cum Sanctis et Angelis universis,
te collaudamus, sine fine dicentes: Sanctus …

DOMINICA I IN QUADRAGESIMA A

De tentatione Domini

Vere dignum et iustum est,
aequum et salutare,
nos tibi semper et ubique gratias agere:
Domine, sancte Pater,
omnipotens aeterne Deus:
per Christum Dominum nostrum.

Qui quadraginta diebus, terrenis abstinens alimentis,
formam huius observantiae ieiunio dedicavit,
et, omnes evertens antiqui serpentis insidias,
fermentum malitiae nos docuit superare,
ut, paschale mysterium dignis mentibus celebrantes,
ad pascha demum perpetuum transeamus.

Et ideo cum Angelorum atque Sanctorum turba
hymnum laudis tibi canimus, sine fine dicentes: Sanctus …

DOMINICA II IN QUADRAGESIMA A

De transfiguratione Domini

Vere dignum et iustum est,
aequum et salutare,
nos tibi semper et ubique gratias agere:
Domine, sancte Pater,
omnipotens aeterne Deus:
per Christum Dominum nostrum.

Qui, propria morte praenuntiata discipulis,
in monte sancto suam eis aperuit claritatem,
ut per passionem, etiam lege prophetisque testantibus,
ad gloriam resurrectionis perveniri constaret.

Et ideo cum caelorum virtutibus
in terris te iugiter celebramus,
maiestati tuae sine fine clamantes: Sanctus …

DOMINICA III IN QUADRAGESIMA A

De Samaritana

Vere dignum et iustum est,
aequum et salutare,
nos tibi semper et ubique gratias agere:
Domine, sancte Pater,
omnipotens aeterne Deus:
per Christum Dominum nostrum.

Qui, dum aquae sibi petiit potum a Samaritana praeberi,
iam in ea fidei donum ipse creaverat,
et ita eius fidem sitire dignatus est,
ut ignem in illa divini amoris accenderet.

Unde et nos tibi gratias agimus,
et tuas virtutes cum Angelis praedicamus, dicentes: Sanctus …

DOMINICA IV IN QUADRAGESIMA A

De caeco nato

Vere dignum et iustum est,
aequum et salutare,
nos tibi semper et ubique gratias agere:
Domine, sancte Pater,
omnipotens aeterne Deus:
per Christum Dominum nostrum.

Qui genus humanum, in tenebris ambulans,
ad fidei claritatem per mysterium incarnationis adduxit,
et, qui servi peccati veteris nascebantur,
per lavacrum regenerationis
in filios adoptionis assumpsit.

Propter quod caelestia tibi atque terrestria
canticum novum concinunt adorando,
et nos, cum omni exercitu Angelorum,
proclamamus, sine fine dicentes: Sanctus …

DOMINICA V IN QUADRAGESIMA A

De Lazaro

Vere dignum et iustum est,
aequum et salutare,
nos tibi semper et ubique gratias agere:
Domine, sancte Pater,
omnipotens aeterne Deus:
per Christum Dominum nostrum.

Ipse enim verus homo Lazarum flevit amicum,
et Deus aeternus e tumulo suscitavit,
qui, humani generis miseratus,
ad novam vitam sacris mysteriis nos adducit.

Per quem maiestatem tuam adorat exercitus Angelorum,
ante conspectum tuum in aeternitate laetantium.
Cum quibus et nostras voces ut admitti iubeas, deprecamur,
socia exsultatione dicentes: Sanctus …

DOMINICA IN PALMIS

De dominica Passione

Vere dignum et iustum est,
aequum et salutare,
nos tibi semper et ubique gratias agere:
Domine, sancte Pater,
omnipotens aeterne Deus:
per Christum Dominum nostrum.

Qui pati pro impiis dignatus est innocens,
et pro sceleratis indebite condemnari.
Cuius mors delicta nostra detersit,
et iustificationem nobis resurrectio comparavit.

Unde et nos cum omnibus Angelis te laudamus,
iucunda celebratione clamantes: Sanctus …

FERIA V HEBDOMADAE SANCTAE

De sacerdotio Christi et de ministerio sacerdotum

Vere dignum et iustum est, aequum et salutare,
nos tibi semper et ubique gratias agere:
Domine, sancte Pater, omnipotens aeterne Deus:

Qui Unigenitum tuum Sancti Spiritus unctione
novi et aeterni testamenti constituisti Pontificem,
et ineffabili dignatus es dispositione sancire,
ut unicum eius sacerdotium in Ecclesia servaretur.

Ipse enim non solum regali sacerdotio populum acquisitionis exornat,
sed etiam fraterna homines eligit bonitate,
ut sacri sui ministerii fiant manuum impositione participes.

Qui sacrificium renovent, eius nomine, redemptionis humanae,
tuis apparantes filiis paschale convivium,
et plebem tuam sanctam caritate praeveniant, verbo nutriant, reficiant sacramentis.

Qui, vitam pro te fratrumque salute tradentes,
ad ipsius Christi nitantur imaginem conformari,
et constanter tibi fidem amoremque testentur.

Unde et nos, Domine,
cum Angelis et Sanctis universis tibi confitemur,
in exsultatione dicentes: Sanctus …

FERIA V IN CENA DOMINI = PRAEFATIO I DE SS.MA EUCHARISTIA

De sacrificio et de sacramento Christi

Vere dignum et iustum est,
aequum et salutare,
nos tibi semper et ubique gratias agere:
Domine, sancte Pater,
omnipotens aeterne Deus:
per Christum Dominum nostrum.

Qui, verus aeternusque Sacerdos,
formam sacrificii perennis instituens,
hostiam tibi se primus obtulit salutarem,
et nos, in sui memoriam, praecepit offerre.

Cuius carnem pro nobis immolatam
dum sumimus, roboramur,
et fusum pro nobis sanguinem dum potamus, abluimur.

Et ideo cum Angelis et Archangelis,
cum Thronis et Dominationibus,
cumque omni militia caelestis exercitus,
hymnum gloriae tuae canimus,
sine fine dicentes: Sanctus …

PRAEFATIO PASCHALIS I

De mysterio paschali

cf.: Transition in the Easter Vigil: Becoming Christians

PRAEFATIO PASCHALIS II

De vita nova in Christo

Vere dignum et iustum est, aequum et salutare:
Te quidem, Domine, omni tempore confiteri,
sed in hoc potissimum gloriosius praedicare,
cum Pascha nostrum immolatus est Christus.

Per quem in aeternam vitam filii lucis oriuntur,
et regni caelestis atria fidelibus reserantur.

Quia mors nostra est eius morte redempta,
et in eius resurrectione vita omnium resurrexit.

Quapropter, profusis paschalibus gaudiis,
totus in orbe terrarum mundus exsultat.

Sed et supernae virtutes atque angelicae potestates
hymnum gloriae tuae concinunt,
sine fine dicentes: Sanctus …

PRAEFATIO PASCHALIS III

De Christo vivente et semper interpellante pro nobis

Vere dignum et iustum est, aequum et salutare:
Te quidem, Domine, omni tempore confiteri,
sed in hoc potissimum gloriosius praedicare,
cum Pascha nostrum immolatus est Christus.

Qui se pro nobis offerre non desinit,
nosque apud te perenni advocatione defendit;
qui immolatus iam non moritur,
sed semper vivit occisus.

Quapropter, profusis paschalibus gaudiis,
totus in orbe terrarum mundus exsultat.

Sed et supernae virtutes atque angelicae potestates
hymnum gloriae tuae concinunt,
sine fine dicentes: Sanctus …

PRAEFATIO PASCHALIS IV

De restauratione universi per mysterium paschale

Vere dignum et iustum est, aequum et salutare:
Te quidem, Domine, omni tempore confiteri,
sed in hoc potissimum gloriosius praedicare,
cum Pascha nostrum immolatus est Christus.

Quia, vetustate destructa,
renovantur universa deiecta,
et vitae nobis in Christo reparatur integritas.

Quapropter, profusis paschalibus gaudiis,
totus in orbe terrarum mundus exsultat.

Sed et supernae virtutes atque angelicae potestates
hymnum gloriae tuae concinunt,
sine fine dicentes: Sanctus …

PRAEFATIO PASCHALIS V

De Christo sacerdote et victima

Vere dignum et iustum est, aequum et salutare:
Te quidem, Domine, omni tempore confiteri,
sed in hoc potissimum gloriosius praedicare,
cum Pascha nostrum immolatus est Christus.

Qui, oblatione corporis sui,
antiqua sacrificia in crucis veritate perfecit,
et, seipsum tibi pro nostra salute commendans,
idem sacerdos, altare et agnus exhibuit.

Quapropter, profusis paschalibus gaudiis,
totus in orbe terrarum mundus exsultat.

Sed et supernae virtutes atque angelicae potestates
hymnum gloriae tuae concinunt,
sine fine dicentes: Sanctus …

PRAEFATIO I DE ASCENSIONE DOMINI

De mysterio Ascensionis

Vere dignum et iustum est, aequum et salutare,
nos tibi semper et ubique gratias agere:
Domine, sancte Pater, omnipotens aeterne Deus:

Quia Dominus Iesus, Rex gloriae,
peccati triumphator et mortis,
mirantibus Angelis, ascendit (hodie)summa caelorum,
Mediator Dei et hominum,
Iudex mundi Dominusque virtutum;
non ut a nostra humilitate discederet,
sed ut illuc confideremus, sua membra, nos subsequi
quo ipse, caput nostrum principiumque, praecessit.

Quapropter, profusis paschalibus gaudiis,
totus in orbe terrarum mundus exsultat.

Sed et supernae virtutes atque angelicae potestates
hymnum gloriae tuae concinunt,
sine fine dicentes: Sanctus …

PRAEFATIO II DE ASCENSIONE DOMINI

De mysterio Ascensionis

Vere dignum et iustum est, aequum et salutare,
nos tibi semper et ubique gratias agere:
Domine, sancte Pater, omnipotens aeterne Deus:
per Christum Dominum nostrum.

Qui post resurrectionem suam
omnibus discipulis suis manifestus apparuit,
et ipsis cernentibus est elevatus in caelum,
ut nos divinitatis suae tribueret esse participes.

Quapropter, profusis paschalibus gaudiis,
totus in orbe terrarum mundus exsultat.

Sed et supernae virtutes atque angelicae potestates
hymnum gloriae tuae concinunt,
sine fine dicentes: Sanctus …

DOMINICA PENTECOSTES

De mysterio Pentecostes

Vere dignum et iustum est, aequum et salutare,
nos tibi semper et ubique gratias agere:
Domine, sancte Pater,
omnipotens aeterne Deus.

Tu enim, sacramentum paschale consummans,
quibus, per Unigeniti tui consortium,
filios adoptionis esse tribuisti,
hodie Spiritum Sanctum es largitus;
qui, principio nascentis Ecclesiae,
et cunctis gentibus scientiam indidit deitatis,
et linguarum diversitatem in unius fidei confessione sociavit.

Quapropter, profusis paschalibus gaudiis,
totus in orbe terrarum mundus exsultat.

Sed et supernae virtutes atque angelicae potestates
hymnum gloriae tuae concinunt,
sine fine dicentes: Sanctus …

SOLLEMNITAS SANCTISSIMAE TRINITATIS

De mysterio Sanctissimae Trinitatis

Vere dignum et iustum est, aequum et salutare,
nos tibi semper et ubique gratias agere:
Domine, sancte Pater, omnipotens aeterne Deus:

Qui cum Unigenito Filio tuo et Spiritu Sancto
unus es Deus, unus es Dominus:
non in unius singularitate personae,
sed in unius Trinitate substantiae.

Quod enim de tua gloria, revelante te, credimus,
hoc de Filio tuo, hoc de Spiritu Sancto,
sine discretione sentimus.

Ut, in confessione verae sempiternaeque Deitatis,
et in personis proprietas,
et in essentia unitas,
et in maiestate adoretur aequalitas.

Quem laudant Angeli atque Archangeli,
Cherubim quoque ac Seraphim,
qui non cessant clamare cotidie, una voce dicentes: Sanctus …

PRAEFATIO III DE DOMINICIS “PER ANNUM”

De salvatione hominis per hominem

Vere dignum et iustum est, aequum et salutare,
nos tibi semper et ubique gratias agere:
Domine, sancte Pater, omnipotens aeterne Deus:

Ad cuius immensam gloriam pertinere cognoscimus
ut mortalibus tua deitate succurreres;
sed et nobis provideres de ipsa
mortalitate nostra remedium,
et perditos quosque unde perierant, inde salvares,
per Christum Dominum nostrum.

Per quem maiestatem tuam adorat exercitus Angelorum,
ante conspectum tuum in aeternitate laetantium.
Cum quibus et nostras voces
ut admitti iubeas, deprecamur,
socia exsultatione dicentes: Sanctus …

DIE 22 IULII S. MARIAE MAGDALENAE FESTUM

De apostolorum apostola

Vere dignum et iustum est,
æquum et salutare,
nos te, Pater omnipotens,
cuius non minor est misericordia quam potestas,
in omnibus prædicare per Christum Dominum nostrum.

Qui in hortu manifestus apparuit Mariæ Magdalenæ,
quippe quae eum dilexerat viventem,
in cruce viderat morientem,
quæsierat in sepulcro iacentem,
ac prima adoraverat a mortuis resurgentem,
et eam apostolatus officio coram apostolis honoravit
ut bonum novæ vitæ nuntium
ad mundi fines perveniret.

Unde et nos, Domine, cum Angelis et Sanctis universis
tibi confitemur, in exsultatione dicentes: Sanctus …